كتب: سمير الوافي
يا سيد كادوريم عاون بلادك وناسك من غير مهرجان وبروباغندا وحملة وكاميرا وراك وطيارة خاصة وتابي روج…يرحم والديك…من غير ما تحاول تحسسنا أنك إنت الوحيد اللي عاونت…فمة شكون عاونو أكثر منك من غير دعاية لأشخاصهم…
ـ فمة طبيب تونسي كبير في سويسرا جاب بمليار تجهيزات ومساعدات…سمعنا بفعلو من غير ما نحفظو إسمو والا نشوفو وجهو…
ـ وفمة رجل أعمال في سوسة عطى لسبيطار واحد نصف مليار من غير ما يقول حتى ربع كلمة…فعلو حكى عليه…
ـ وفمة برشة توانسة في الداخل والخارج يعاونو في السبيطارات كل يوم… وجمعيات صارفة مليارات من غير شخصنة فجة ومبتذلة…وفمة اللي لا نسمعو بيهم لا نشوفوهم وكان موش هوما راك ما خلطش على البلاد صامدة وتقاوم لتوة بعد عجز الدولة…!!!
يعني ماكش باش تعلم الوطنية للتوانسة…والخير لقلوبهم الكبيرة…والا تزايد عليهم في الوطنية…وما عطيتش أكثر منهم…عاون برقيّ وترفع وصمت نبيل…وانت كل مرة حسّك سابقك وزغاريدك أكثر م الكسكسي…وإخراج سينمائي لكل كردونة تمدها…
وتلافز وكومينيكاسيون ودعاية صاخبة…يا أخي شكر الله سعيكم…لكن لا تحوّل العمل الخيري إلى دعاية لشخصك…وكأنك الوحيد والفريد الذي يساعد ويتبرع…ولا أحد ينافسك في الوطنية…وكل دينار تدفعو تعمل عليه كليب…!!!
إرسال تعليق