8 مارس هو اليوم العالمي للمرأة... لكن في تونس لهذا ليوم طعم خاص.
أصلا، تونس أسستها ''مرا''.... و دافعت عليها ''مرا''.. وقراتها ''مرا''... و ''داواتها مرا '' ....
في 814 ق.م، عليسة أسست قرطاج، التي توا اسمها تونس. كيفاش ؟ عملت إتفاقية متاع تعايش سلمي بين الشعوب و وقعتها مع يارباس ملك النوميديين، و إلي شرط عليها أنها تتزوج منو بش يحافظ على الأمن في قرطاج ... عليسة وافقت ... صححت على الورقة متاع العرس .... صحح هو على ميثاق التعايش السلمي في قرطاج ... و بعد رمات روحها في النار ... خاطر هذاك الحل الوحيد بش يعيش الشعب في سلام وما تعيشش هي مع الراجل إلي ما تحبوش ... والشي هذا .. ما تنجم تعملوا إلى ''مرا''...
في الحروب البونية، بين روما و قرطاج... جداتنا.. نساء قرطاج .. كان يقصوا شعرهم بش يصنعوا حبال للسفن و يعطيو المجوهرات متاعهم بش يصنعوا سلاح....
أروى القيروانية، فرضت على الخليفة أبو جعفر المنصور إلي حب يعرس بيها، إنو ما ياخو حتى مرا وحدة أخرى ... وتعقد وقتها أول عقد زواج مدني ... وإلي برشة دول مزالو ما يعرفوش شنوا معناها حتى لتو.
توحيدة بن الشيخة، هي أول طبيبة في العالم العربي والإسلامي... في وقت بلدان اخرين .. مزال عيب كيف الطفلة تمشي تقرى ... و الدكتورة توحيدة بن الشيخ هي إلي عملت التنظيم العائلي في تونس... بش وصلنا ليلي وصلنالو تو...
مع هذا الكل عنا ليستة طويلة وعريضة متاع أول قاضية و أول قائدة طائرة و أول .. وأول أول ...
اول صيدلانية: ايفات حداد
اول طبيبة اسنان: فيروز حداد
اول مبرزة في الرياضيات: فاطمة معلى
اول مديرة معهد ثانوي : زبيدة عميرة
اول قائدة طائرة: علياء المنشاري
اول محامية وأول قاضية: امنة عويج
اول رئيسة محكمة: رفيعة بن عزالدين
اول مديرة سجن رجال : ليلى الجديدي
إرسال تعليق