وجه الدكتور ماهر العباسي برسالة لرئيس الجمهورية دعاه فيها الى فتح تحقيق عاجل حول ارقام الوفيات بفيروس كورونا معتبرا ان هناك تلاعبا في البلاغات اليومية لوزارة الصحة و اضاف العباسي في التدويتة التي نشرها على حسابه الشخصي بالفايسبوك و تجدون نصها أدناه بأنه يعلم عديد المعطيات حول الموضوع :
إلى السيّد رئيس الجمهورية : الطلب : فتح تحقيق فوري عن طريق مجلس الأمن القومي التلاعب بأرقام الوفايات متاع الكورونا هو موضوع خطير يمس من الأمن القومي على زوز أصعدة . الوفايات متاع الكورونا تعتبر من اكثر المؤشرات دقة في متابعة تطور الجائحة . بالنسبة للكورونا فمة زوز أصعدة يمسو من الأمن القومي متاع البلاد : * الصعيد الصحي خاطر حياة الناس غالية * الصعيد الإقتصادي خاطر رزق الناس أمانة وإقتصاد البلاد هو قلبها ===> للأسف الزوز أصعدة هذومة في تناقض ويلزم المسؤول كل مرة يبجل شوية واحد عالآخر باش تنجم البلاد تخرج بأخف الأضرار ===> في الكورونا أهم حاجة هي الإستشراف يلزمك تعرف قبل بجمعتين ثلاثة وين التوجه متاع الجائحة ... كان التفشي والوفايات في تصاعد تاخو إجراءات وتضحي بالإقتصاد ... كان الأمور في إنفراج تستبق وتبدا تحل باش تنقذ الإقتصاد . ===> أهم حاجة في مواجهة الكورونا هي متابعة تطور الجائحة شوفو أحنا في تونس مليون مرة طالبنا بدراسات تمكننا من متابعة تطور المرض لا حياة لمن تنادي وما عملنا حتى دراسة وال 650 الف تحليل سريع اهوكم مرميين في الدبوات . باهي قلنا نتبعو التطور بعدد الوفايات ....
شوفو شنوة عملولنا .... مرة يهبطو البيان كل نهار مرة كل نهارين مرة كل ثلاثة أيام ... مرة يهبطوه بالأزرق مرة بالأخضر مرة بالقزوردي وكل مرة يبدلو في طريقة تقديم المعلومة ( علاه الله أعلم ) وبعد عملولنا التحيين كل نهار يحطولنا خمسين وفاة مرة من واحد أكتوبر ومرة من واحد نوفمبر ... والقطرة التي أفاضت الكأس بيان البارح نحاو التحيين ورماولنا عدد صادم 96 وفاة . التفسير الوحيد للتصرف هذا هو أنو فمة دوسيات مخبية .... فمة des cadavres dans le placards..... تقول عليهم عندهم مجموعة وفايات كانو متكتمين عليها وتوة يعطيونا فيهم بالتقسيط .... تقول فمة بونتوات بيناتهم والا شنوة التفسير انو في نفس النهار ناخذو إجراءات تنبئ بتحسن الوضع من هوني ونهبطو عدد 96 وفاة من غير تفسير كاينهم توفاو في نهار واحد . شنوة صاير ؟
علاش هالغموض ؟ راو أحنا ماناش عايشين في المريخ وتوصللنا الأخبار أما عنا مسؤولية ومانحبوش نبثو البلبلة .....وعنا أساتذتنا قراونا وعلمونا ويلزمنا نحترموهم وألف مليون مرة من أجل عين تكرم ألف عين ونبلعو السكينة بمها ونسكتو ولكن كيف نوليو نلعبو بأمن البلاد ماعادش فيها سكات . ولهذا وبكل هدوء .... السيّد رئيس الجمهورية أعملو لجنة تحقيق تحت مسؤولية ادارة الصحة العسكرية الي فيها أطباء تونس الكل تشهدلهم بالنزاهة والاستقامة والكفاءة يعطيونا تقرير مفصل ودقيق على أسباب هذا العبث وهذا الغموض ويخرجو يفسرولنا شنية الحكاية بكامل الوضوح وبدون ذر رماد على الأعين ... خاطر اللعب في موضوع كيما هكة كان موش باش يقضي على صحتنا راو باش يقضي على إقتصادنا وهذومة الزوز تابعين الأمن القومي دونك تابعين صلاحياتك . والسلام
إرسال تعليق